تیلیم خانین لیریکاسی اونون مهری خانیما اولان سئوگیسی و بو یولدا چکدیگی آزار
اذیّت لر له ایلگیلی یارانماغا باشلامیشدیر بو ایسه اساساً شاعیرین گنجلیک
دؤورانینه عاید دیر و بو شعرلرده ان گؤزل و اینجه لیریک شعرلردیر .
تیلیم خانین بو شعرلر سئوگی و محبّت مضمونلو لیریک گارایلی ، قوشمالار ، جیغالی
تجنیسلر دیر کی تورک ادبییاتیندا مثلسیزدیر. و ايندي تيليم خانين شيرازا گئتمه گي و نه
اولدوغونو، شئعرلری ايله آشاغیدا دئييب ويازيب تقديم ائيله ييرم بوتون ائل سئون ، فرهنگ
وادبييات وهونرسئون باجي قارداشلاريما وحؤرمتلي صنعتچيلريميزه :
گورَك دَده تيليم خان نه اولور كي ايسير گئدَه شيرازا ،بير نئچه واخت صفي خان مهري خانيمي
آلاندان سوُرا مركزدَن حوُكم گلدي صفي خان گرك گئديب شيرازدا نايب الحكومه اولسون
( اوستاندار)بوناگؤره صفي خان حؤكم ائيله فراش وقاراباش وكوچ وكولفت حاضيرلاشيب
كوُچدو شيرازشهرينه . تيليم خان گؤردو داهي مهري خانيمي گؤره بيلمَز اَلي اَلدَن اوزولوب گلدي
بير نئچه واخت قاپيني باغلاييب اوزونَه هامي ايشلردَن اَل اوزدو. آمما كندين بؤيوك لري ،آغ
سَققل، قؤوم قارداش ييغيلدي دئديلر گئدك گؤرك نه اولوب بو نه ايش دير؟ گليب لر بير آز
دانيشيق دان سورا نئچه سي دئدي آللاهين قسمتي دير يازيلان يازغيني بير كيم پوُزا بيلمَزاولاجاغا
چارا يوخ ، گلين گئدك مهري خانيمين قارداشلاري ايله دانيشاق باجي لاري تَرلان خانيمي
وئرسينلر تيليم خانا بودا عَمي قيزي دير فرقي نه دير داهي بيلميرلر آتا بابالاريميز دئمه
لي :گؤيول سئوَن گؤيچك اولار ، هَله باخين گؤرون گئچي ساتان بِز گؤتورور ؟ خبر آلين تيليم
خان دا راضيليق واري بو ايشه !؟ بوفيكرلري بيري ائيله مه ييب گليب سؤزونَن و ديل ايله تَرلان
خانيمين سؤزون دانيشديلار و ايشي باشا يئتيرديلر ، تيليم خان نئچه واخت تَرلان خانيم نان
دوزوب ،آمما هر گولون بير قوخو واري گؤردو مهري خانيم قوخوسو بو عَمي قيزيدان گلمير ،
بيردَه رقيبلر ، فوضول آداملار و شيطان صيفت لر تيليم خاني گؤرندَه طعنه لي سؤزلر دئييرلر ،
تيليم داهي تاب ائيله يه بيلمه دي ،
فيكر ائيله دي بيله كي اولماز نه دوزَه بيلير ، نه مهري ياديندان چيخار ، عزميني جَزم ائيله دي
گرك گئديب شيرازا صفي خاني اوز به اوز گؤروب دانيشام ، باش تاپام كي منه دوشمانليق
اولوب ، يا مهري خانيم اؤزو حاضير اولوب بو ايشه !؟ بواولدو كي گليب تداروك گؤردو ،آللاه
و مَحَمّد وعليني ياد ائيله ييب دوشدو يولا شيراز شَهرينَه گئتمه گه ، گونه بير منزيل وطيّ
منازيل گونلرين بيريندَه يول اينجيتميشدي باخدي يولون كناريندا بير گوللو چيچك لي سو گؤلو
گؤرسه نير گلدي گؤلون باشيندا بير آز دينجَل سين ، گؤردو اوزاقدان داغين آياغيندا قاراچاديرلار
دايانيب بير بيرينه سورو قويون ، اوسته سركِشلي بَدوُو آتلار و........ داغيليب داغين آياغيندا ياييلير
آمما بير اوجا بوُيلو گولر اوزلو قيز خالقي نئچه قيز دَه باشي جَه گلديلر گؤل باشيندا تيليم خاني
گؤرجَك قيز دئدي: هاردان گليب هاراگئديرسن ؟ تيليم خان دئدي : بيز ِم ائللردَه رسم بودور سؤزو
سازو سؤز ايله جاواب وئ رمه لي يَم قولاغ آس دئييم :
اَلحَــــمـدوُ لِلّهِ رَبِّ العـــــالَمين
سؤئيله نه ديلدَه سن ! نه ديل ديللَشيم؟
مَذهب دَه جعفـري يَـــم وَلاَلضّـا لّين
سؤئيله نَه ديلدَه سن ! نه ديل ديللَشيم؟
اگــــر اَرمَني سن آقـــچِ كه پيرني
قــــــولاغ وئــرسؤزومه آقـچِ كه پيرنی
محللــــي من دويــــو آقــچِ كه پيرني
سؤئيله نه ديلدَه سن ! نه ديل ديللَشيم؟
اگـــر موسايي سن بوُلــــــووس منـه
من راز - ديليمي سؤئيله ييـــــم سنه
ورنه - لــــــوسايي سن جُلـووس منه
سؤئيله نه ديلدَه سن ! نه ديل ديللَشيم؟
اگــر كي كوردي سن ، كوردي نَزانــوم
زيكـــــه ته هَللاريم حالي چــه زانوم
اگــــــر دَنگي ننگي ورسن كي يانـوم
سؤئيله نه ديلدَه سن ! نه ديل ديللَشيم؟
اگــر شَوَنــدي سن لازَه چـــروازي
هـــرچي كـي بِـوازي اَثــــر نـوازي
اَركلــه ي جي دَري چـرام نــــوازي
سؤئيله نه ديلدَه سن ! نه ديل ديللَشيم؟
اگــــر لزگي يي سن مــردُم و دئيليـم
انيس – شب و روز نئيليم و دئيليــــم
چه پوردي چه پوردي سوئيليم وسوئيليم
سؤئيله نه ديلدَه سن ! نه ديل ديللَشيم؟
اگـــــر فــرنگـي سن مُقيلـي بچـه
اي مُقـــلي - مُقلَت مُقلِــي بچـــه
اي مُقيل مـــرطـوقس مُقيلـي بچــه
سؤئيله نه ديلدَه سن! نهُ ديل ديللَشيم؟
اگــ ر كي عـَرب سن طعَـل و طعَـل
اُريـدُكَ جَميـل طعَـــل و طعَـل
طَهـرّو بلاسن طعَـــل و طعَل
سؤئيله نه ديلدَه سن ! نه ديل ديللَشيم؟
اگـــر ائليا تي سن تـورك ِ قاشقايي
تـَرَه قاشقايي سن ؟ يا تـــؤوا قاشقايي
سني اينجيتمَرَم تَرَه قــــــاشقــايي
سؤئيله نه ديلدَه سن!نه ديل ديللَشيم؟
اگر لُر - بختييار سن چـه حالــي
وئـر اَميم لبلرين حالي بــه حالي
پريشان ائتمـه سن من بِنَـوانــــي
سؤئيله نه ديلدَه سن! نه ديل ديللَشيم؟
اگـركي فارسي سن عجب جاوانــي
اي سرو - صنوُبـر چـــه خوراماني
سايـه نشين بـودي ! سفيده جـــاني
سؤئيله نه ديلدَه سن ! نه ديل ديللَشيم؟
اگـر كي تـورك سن دئمَه قورخورام
تيليمَــم مَن نابَلـدَم نا خورام
درس آلماميش عِلمان ديلين اوخورام
سؤئيله نه ديلدَه سن! نه ديل ديللَشيم؟
ائل قيزي دئدي : اوغلان دونيادَه سؤز ايككي اولار بيري سندَه ، بيري دَه مندَه ايندي
سن قولاغ وئر من دئييم ديري ديري دانيشما :
منه سؤئيله مكاني يي --- هارالي سن يولچو اوغلان ؟
يالوار يب قورتار جاني يي ---- اؤگونور سن يولچو اوغلان ؟
دَدَه تيليم خان دئدي : من اوّل جه سنه دئديم توركو دانيشيم ، فارسي ، عربي ،
كوردو، ارمني و..... سن ديللنمه دين ايندي قوتازلي دانيشيراي ! بئله بللي دير ديلين
دينج دورماياجاق اؤزوي دئدين سؤز ايككي دير ايندي سن قولاغ وئر:
گؤرور سن كي من يولچويام ---- هئچ اؤگونمَز يولچو اوغلان
توركم اصلي توركمانلي يام --- هئچ اؤ گونمَز يولچو اوغلان
قيز جاواب بيله دئيير:
ائليمين عشوه نازي يام ---- گؤللرين اوُردَك غازي يام
اؤز ائليمين شاهبازي يام --- اؤگونور سن يولچو اوغلان
تيليم خان جاوابين بيله دئدي :
گؤيلويون يئوين ييخارام --- جيگريي اؤد لا را ياخارام
ائلي يَه صاحاب چي خارام --- هئچ اؤگونمَز يولچو اوغلان
قيز دئدي بو خياللاردان چوخلاري ائيله ييب قولاغ وئر:
عشقين اليندن آليش ما --- گل نادانلارا قاريش ما
هَرزَه سؤزلردَن دانيش ما --- اؤگونور سن يولچو اوغلان
تيليم خان دئدي من دئديم نابلدَم يولچويام بير سؤز دئمه ديم ، گؤرك جاواب نه دئيير :
دورموشدوم يولوماگئديم --- آخي من سنه نه دئديم
بير ايش گؤردون گلدي بَديم ---- هئچ اؤگونمَز يولچو اوغلان
قيز دئدي گوناهكار اولدوم خبر آلديم هارا گئدير سن ؟ قيز بيله جاواب دئدي :
منيم آديم دير قيز خواتين ----- سؤز دئييرَم ظاهير باطين
تانيرام اينسانين ذاتين --- اؤگونور سن يولچو اوغلان
تيليم خان دئدي: من بو آرانين غريبي يَم اؤزومدَه يولچويام گل منيم واختيم توتما :
هر گئدَه نين يولون توتما ---- هر آصلانا كمند آتما
اؤزوي تيليم خانا ساتما --- هئچ اؤگونمَز يولچو اوغلان
بير سؤز دئديم ؤزلري تامام اولدو تيليم خان ديل اولدي اگر بير سؤز دئديم مندن اينجيدين باغيشلارسن بوردا ائل قيزيندَن راضيليق ايله آرالاندي دوشوب يولا گئدديگي يئردَه مهري خانيم ، روزگار،آيريليق ،بيله چولدَن چوله دوشمه گي يادي نا دوشوب گؤرَك نه دئيير :
گؤيول عشقين آتيشينَه – نئجه دوشدون دي يان ايندي
گليب گيردين بو مِيدانا --- آياق چكمَه دايان ايندي
عاشيق بير يانا بس دير بَس --- كاباب بوُريانا بَس دير بَس
رقيب بير يانا بَس دير بَس --- منه وئر گل دي يان ايندي
عِشرتين گولونو دَرديم ---- حئييف گولو بادَه وئرديم
رقيب لر بيلمه سين دَرديم --- يئردَه قالسون دي يان ايندي
گليرَم بودور ياخونا --- عرضيم كويوندا اوُخونا
گلسين مُخاليف اؤخونا --- يارا يامان دي يَن ايندي
اَزل دَن گؤردوگوم ايش من --- طمع دَن غازموشام ديش مَن
خلاف عرض ائيله ييب دوشمن --- دوست دور تيليم دايان ايندي
گل هاگل چاتيب شيراز شهرينه بير آز فيكر ائيله دي موقَدّيمه سيز اولماز مهري خانيمي يا صفي خاني سوروشوب تاپام ، اوُيئردن كي اؤزو قابيل دولگري دير فيكر ائيله دي بير مقدار دولگرليك لوازيماتي آليم اليم بند ائيله ييم بلكه آللاه كومك اولا فراش دان ، كنيزدَن و.... گؤروم ياواش ياواش گئديم چاتيم صفي خانا . بوردا تيليم خان باشي قاريشدي لوازيم آلماغا . خبر وئريم مهري خانيمدان : عاشيق لارين سؤزودور : ناغيللاردا منزيل اولماز بوقَدَر گون گوندَن آي آي دان گئچدي آللاه مهري خاني ما ايككي اوغلان وئريب . ايندي نئجه پيش دبستاني و يا آمادگي مكتب لر وار ، اوُ زامان دا خوصوصي مكتب خانا واريدير صفي خانين اوغلانلار گئدردي مكتب خانا آمما آللاهين ايشي ديرتيليم خانين اقباليندان اوشاخلارين مكتب خانا يولو تيليم خانين دولگري يئوي نين قانشاريندان گئچيب گئدير . آتابابالاريميز دئمه لي : اينساني گرك آللاه ايسته سين ، دَلَمَه يوماشاق اولار !آمما آللاه ايستهمَه سَه ديش سينديرار .آللاه بيله قاپي وتاختاني جورله ييب هئچ اوستادين ايشي دئييل . اوشاخلار گليب گئدندَه تيليم خان گؤرور باخاندا اوشاخلارا بير اؤزگه حال تاپير. قديم دَن دئييرلر غوربت اؤلكه دَه قؤوم ، ائلداشي ووطنداشي بير بيريني گؤرندَه قان چَكَر، تيليم خان گئديب فيكره عاقلي بويئره چاتدي نه اولار من اوشاخلاردان خبر آليم گؤروم ايش هاردان هارادير.سحر اوشاخلار مكتب خانادان گئري گلندَه تيليم خان اوشاخلارين بيريندَن خبر آلدي بالا سيز كيمين بَبَه سيز؟اوشاخلارين بيري ديللي باشلي ييدير دئدي نَنَم مهري خانيم دير ، دَدَم صفي خان دير ، تيليم خان بير آه چكيب دئدي آللاه جان شوكورلر اولسون بورا كيمين ياقچي گليب آللاه عاقبتين خير ائيله سين . بؤيوك شاعيرلريميز سؤزودور :
مَحبّت بیر بلا شئی دیر گرفتار اولمایان بیلمَز
زیمیستان چکمه یَن بولبول باهارین قدرینی بیلمَز
مَحَبّت مَحَبّت گتيرير تيليم خان بوقَدَر اوشاخلارا مَحَبّت ائيله دي اوشاخلار مكتب خانادان درس آلاندان سورا گليب اوستاد دولگر دوكانيندا اوُينارديلار آغشام گئدرديلر
تیلیم خان بوقَدَر اوشاقلارا محبّت ائیلردی اوشاقلار بیر یاتماغا گئدردیلر یئوَه . نئچه گون گئچدی گونلرین بیریندَه مهری خانیم باش تاپدی اوشاقلار ناهاردا وشام دا ، قلیان آستی دا یئه ییب ایچمیرلر ! یئه ییب ایچمه ین آدام گون به گون آریخلاشار، آمما بولار گون به گون کؤک اولورلار ،گئتدی فیکره اورَکدَه دئدی:( اوُلمايا ! کاسا آستیندا نیم کاسا وار) نه ایش گؤروم !؟ فیکر ائیله دی سحردن بیر دیری باش فراش گؤردو دئدی: انعام هرنه ایسته سن وئر رَم ، گؤربواوشاقلار يئودَن چيخاندان سورا هارا گئدیرلر!؟ فراش دوشوب اوشاقلارین آردیجه گؤردو اوشاقلار گلیب مکتب خانه دَن درس لرین آلدیلار مکتب خانادان چیخیب یولون آراسیندا گئچدیلر بیر دولگر دوکانینا فراش دا گیردی دوکانا گؤردو اوشا ق اوُیناتمالی شئی دَن هرنه ایسته سن وار ، نوقول ، نوخودچی ، کیشمیش و...... اوشاقلار بوردا اوُیناییب آغشام گلیللر یئوَه . گلدی گؤردوکلرین مهری خانیما تعریف له دی ، مهری خانیم فیکر ائیله دی دولگر اولا ومنیم اوشاقلاریما مَحَبّت ائیله یَه مومکن اولار تیلیم خان دیر ! آمما آتالار سؤزودور: ائشیتمه گی نَن گؤرمه گین چوخ فرقی اولار فیکر ائیله دی یاقچی سی بودور گئدیم گؤزوم نَن گؤروم ( سفارش نان حاج قبول اولماز)گؤروم اگر تيليم خان دير تیلیم خان اول سا بیر نحو ایله راضی لشدیریم گئت سین اؤز بولگه میزه مومکن دیر صفی خان باش تاپا اؤلومه گيدَه ! میثال دیرآتا بابالاردان قوُووم قوُووم اَتینی یئسَه سوموگون آتماز . اوره گيندَه دئدي آللاه اؤزوي كومك اول ، مهری خانیم ایکی کنیز ایسته دی دئدی فیکر ائیله یین نه شیکیلدَه گئدَک بیر دولگر دیر من ايستيرَم اونو گؤرَم آمما اوُ منی تانیماسین؟ کنیزلرین بیر دئدی : خانیم مومکن اولار اوچوموزدَه هربیریمیز بیر آت مینیب و کیشی پالتاری نا گئیینَک گئدک آت ناللاماقا !؟ دئدی چوخ یاقچی دیر بویوردو قوللوقچولار گئدیب اوچ آت یهرله دیلر،مهری خانیم ایکی دَه کنیزلرگلدیلر دولگری نين قانشاریندا اوستا سالام ! علیک سالام اوغور اولسون ؟ عوُمرون چوخ اولسون اوستا جان بیزیم آتلاری ناللایای بیز گئدرگی ییک ؟ اوستا دئدی : آتی دَمیرچی ناللار من دولگرَم سیزگئدین دَمیرچی یانیندا آتلارینیز ناللایین ؟ مهری خانیم دئدی اوستا بیزیم آتلار بوردا ناللاناجاخ ! آغاجدان دا اولوبدور ناللا ؟ تیلیم خان لهجه دَن بیلدی مهری خانیم دیر آمما کیشی پالتاری گئییب ، فيكر ائيله دي مومكن اولار منيم بورا گلمه ييمي باش تاپيب . دئدي : قولاخ وئرین سیزَه دئییم آتلار هاردا ناللانار : گؤرَک تیلیم خان نه دئییر ، مهری خانیم نه ایش گؤرَه جک.
عشق اؤدونو شیرین جانا سالدیرمازلار منیم جانیم
مارال دوغوب ! اژدرهایا آلدیرمازلار منیم جانیم
گاوچران کی اولماز صیّاد پالان تیکن اولماز خیّاط
دولگرلرَه دَمیر پـــــولاد دؤیدورمزلر منیم جانیم
سوُداگر اولماز مینا گر میناگر اولماز چيلنگر
دَمیرچی یئرینه دولگر اؤلدورمزلر منیم جانیم
دئمَه توش گلدین نادانا قَمچی وورما اوُ حیوانا
کیشی پالتارین دا قادینا گئیدیرمزلر منیم جانیم
تیلیم خان تانی دیر کی مهری خانیم دیر، اؤز اورَگیندَه دئدی یاقچی سی بودور دئییم من تیلیم خانام سندَه مهری خانیم هر نه اولار اولسون:
تیلیم خان گئچیب باشیندان داهی اوسانماز ایشیندَن
قَلمین تَرسه باشیی نان یازدیرمازلار مهری جانیم
سؤزلری دئدی مهری خانیم گؤردو تیلیم خان دیر ایسته دی کنیزلر بیلمه سینلر سسلندی اوستادِ دولگر دوغرو دئییر بیز گرک گئدَک دمیرچی یانی نا ،مهري خانيم ايسته دي یولادوشه گؤرک تیلیم خان نه دئدی :
آلاگؤزلو نازلی دیلبر نه اوچارسن هاوالاردان
سن آللاه گل کسمَه اُلفت بیزیم تَک بیناوالاردان
من کی سنیی داشیی آتمام یادلاری نان اُلفت قاتمام
آلماسام من سنی! گئتمَم سیزین بو آستانالاردان
من دئديم گل سنه دوستام عشقيندَن من دل شيكستم
اَممیشَم لبلریندَن مستَم اَل گؤتدوم میخانالاردان
هرگؤزَل دیل پَسَند اولماز هر ایگید اَهلِ دَرد اولماز
شمعَ یانماق آساند اولماز گئد اوُرگن پَروانالاردان
گنــــــه باد - صَبا اَسدی صبر – قراریمی کسدی
تیلیمین وافالی دوستی گل اولما بیوافالاردان
مهری خانیم ایشاره ائیله دی کنیزلره گئدَک اوستا دوغرو دئیر گلدیلر مهری خانیم گئتدی غم دریانین ایچینَه دئییر آللاه بیلسَلر عَمیم اوغلو اؤلومَه گیدَر نه ایش گؤروم !؟ فیکری بورا چاتدی ایکی فراش گؤردو دئدی بیر یاقچی انعام وئررَم گئدین بو تئزه گلن دولگردیر بیر ایش گؤرون بو بؤلگه دَن قویوب گئدسین ، فراش لار گلدیلر دولگر دوکانین تاپدیلار اوستا سالام آللاه کومک اولسون ؟ تیلیم خان سسلندی علیک سالام اوغور اولسون ؟ فراشین بیری اوُلاردانی دی کی دئییردیلر گئت باش گتیر گئدیب بوُرک گتیرردی ، بیری چوخ قانمایان اصیل سیز دئییردیلر گئت بوُرک گتیر باش گتیرردی . اوُ قانان فراش گؤردو اوستا بیر دوشونَن بیلیجی ، وعارف اینسان دیر بولاری دعوَت ائیله دی قهوَه قلیانا ، آمما قانمایان فراش دئدی رحمتلیگین اوغلو بيلر سن بورا نايب الحکومه عماراتي دير ؟ بورا هارا دولگرليك هارا ؟تئز بولاری ییقیشدیر یولداشی دئدی یولداش صبرین اولسون گورَک بو کیشی هاردان گلیب هارا گئدن دی گؤرمورَی لهجه سی بیزیم لهجه ی نَن فرقی وار! تیلیم خان دئدی : بیزیم ساوا تورکلری قوناقی سئورلرحؤرمت ائیله ییللر سیز قوناقیز قهوَه دَن قلیان دان بویورون مندَه شئعری نن دئییم هاردان گلیب هارا گئدیرَم : اصل وکؤکو اولان فراش یولداشین راضی ائیله دی گئچیبلر دوکانا ایلَشدیلر گؤرَک تیلیم خان نه دئییر:
داد آقالار گلین عرضیم ائیله ییم ..... روخصت آلیب عالی شأن دان گلیرَم
سینَم دَفتر اولوب دیلیم قلمدان ...... آتمیش پیلله نَردیباندان گلیرَم
ايچيب ايچيب عشق جامينين مَستی یَم . .. هَر یئردَه من عاشیقلارین دوُستی یَم
مورادیم آلمیشام کَمَر بَستی یَم ...... ایمام ریضا.ع. غریباندان گلیرَم
قوُیمادیلار اؤز گونومَه آغلایام ...... دردی چکیب جیگریمی داغلایام
دئسينلر دونيانين جمعين باغلایام ....... تفسیرچی یَم من دیواندان گلیرَم
کَندیم مَرَغئی دیر ، شهریمی دیر ساوا ...... مَزلَقان چاییندان گؤتوردوم هاوا
عاشیق لار دَردینَه ائیلرَم داوا ..... طبیبَم من هیندوستاندان گلیرَم
بیلَن لر بیلسین لر من تیلیم خانام ..... بیلمَه یَنلر بیلسین گؤهرَم کانام
ساکینِ – مَرَغئی اصل دَن تورکمانام ...... گزه گزه من هَر یاندان گلیرَم
قانان فراش دئدی یولداش حئییف دیر بو کیشی بوردان گئدسین هر زامان اورَگیمیز ایسته دی گلیب بوردا بیزیم ایچون بیله دَیَرلی شئعرلر اوخویار بللی دیر بؤیوک اینسان آدام دیر گل اینجیتمه گئدیب خانیما بیر سؤز تاپیب دئییه ریک دور گئدَک فراشلار تیلیم خانی نان دوست اولدولار گلیب مهری خانیما دئدیلر خانیم ساغ اولسون اوستا دئییر من کاسیبَم اگر قاداغادیر هامی قاداغا اولسون منیم کیمسه یَه آزاریم چاتماییب . مهری خانیم دئدی نئجه اولار سیز مورخص گئدین . قالدی ایکی یولون آراسیندا آللاه ! کنیزلر ، فراش لار سحر بیلسه لر بوآغیزدان اوُ آغیزه دوشر صفی خان قولاغی نا چاتانا منی کی منه وئریلر . نه ایش گؤروم!؟ گنه فیکر ائیله دی بو عاقلی نا چاتدی تاپشیرماقی نان (سفاریش) حاج قبول اولماز، گئدیم اؤزقولاغیم نان ائشیدیم ، نه ایش گؤروم؟ فیکری بورا چاتدی اوستادی ایسته رَم گلیب حوکومت سارایی نین چوروموش ، پوُزولموش وخاراب اولان قاپی پَنجَره سی نی دوزَلدسین ، بو باهانای نان بوردا گؤروب دانیشیب دوشوندوررَم صفی خان بیلسَه اؤلومَه گیدَه رَی.هرآیین دؤرد هفته سیندَه بیر هفته نین آراسیندا صفی خان بَلدی یَه دَه جلسه قوراردی ، مهری خانیم اینتظار چکدی جلسه قورولان گون بیر فراش گؤندردی اوستا دولگری گتیرسین حوکومت سارایی نین قاپی پَنجَرَه لری گؤرسون ، فراش گلیب تیلیم خانی گتیردی حوکومت سارایی نا ، مهري خانيمين بختيندن جلسه قورولان زامان آراسیندا بیر یامان سانجی صفی خانی یاخالادی ناچار قالدی گلسین يئوَه ، خبر وئردیلر مهری خانیم ساغ اولسون صفي خان کئف سیز اولوب تشریف گتیریر! مهری خانیم بیر کنیز گؤروب دئدی گئد تئز اوستایا دئگی نَن گئدسین سورا دئییرَم نَه گون گلسین .کنیز گلدی دیل اولدو اوستا خانیم بویوردو بوگون بلدچی یوخدور، گئد سورا گلرسن! اوستا دئدی : کاغاذ قلم واریندی نئچه سؤز واريم يازاسن؟یازماق بیلرسن؟ کنیز دئدی: جیزمَه قارادان باشیم چیخار ، تیلیم خان دئدی : هرنه دئدیم یاز وئرگی نَن خانیما ! کنیز فیکر ایله دی اوستا ایستر نه شئی لرکی قاپی و...... لازیم دیرسییاهی توتا،کنیز قلم کاغاذ حاضیرلاییب گؤرَک تیلیم خان نَه دئییر:
آؤدی وار................
این وبلاگ یک وبلاگ شخصی است و نظرات نویسنده ی آن را منعکس می کند .